Дмитри Врубел, рускиот уметник кој го наслика еден од најпознатите мурали на Берлинскиот ѕид, почина на 62 години од последиците на ковид-19.

Неговото дело „Боже, помогни ми да ја преживеам оваа смртоносна љубов“ стана симбол на крајот на Студената војна, а содржи репродукција на фотографијата од 1979 на која се бакнуваат лидерите на Советски Сојуз и Источна Германија, Леонид Брежњев и Ерих Хонекер. Врубел го наслика муралот во 1990, неколку месеци по падот на Берлинскиот ѕид и обединувањето на Германија.

Оригиналното дело беше уништено во 2009 при реновирањето на остатоците од ѕидот, по што Врубел наслика нова верзија. 

Врубел е роден во Москва во 1960. Иако студирал, никогаш не завршил ликовна академија, но во 1983 бил примен во Здружението на уметници на СССР. Отсекогаш важел за уметнички дисидент и првпат се преселил во Берлин во 1990, каде што брзо станал препознатлив со својата ѕидна уметност. Тој почина во Берлин, каде што постојано живееше од 2010.