Книгата „Сè пројде: Југославија во спомените на луѓето од Македонија“ ќе се промовира вечерва  во 18 часот во скопскиот кафе-бар Цреша. Станува збор за збирка интервјуа правени од студенти по етнологија и антропологија со луѓе од различни возрасти, професии и место на живеење, во врска со нивните спомени и чувства за некогашна Југославија.

Опсегот на теми кои се допираат е широк – од статусот на жените во социјализмот, развојот и улогата на спортот, различните занаети, животот во скопската Стара чаршија, забавата на младите особено во помалите места во Македонија, новинарската и преведувачката работа. Секој соговорник има своја перспектива за тоа што претставувала некогашната држава и свои искуства во врска со неа.

Целта на изданието, кое е дел од поширок проект за регистрирање на усни истории, е да се прикаже оваа разновидност на гледишта како алтернативна историја во однос на онаа „официјалната“.

Гостите се поканети да донесат и предмети кои асоцираат на Југославија, кои ќе бидат изложени во текот на промоцијата.  Промотор на изданието ќе биде Свето Серафимов, најстариот новинар и преведувач во Македонија, долгогодишен дописник на „Нова Македонија“ од Африка и Блиски Исток, како и преведувач на 102 книги главно од англиското јазично подрачје на македонски, меѓу кои „Улис“, „Ајванхо“ и „Оливер Твист“.

Изданието е тријазично – на македонски, албански и англиски, а неговото објавување е резултат на соработка на Институтот за етнологија и антропологија при УКИМ, организацијата Форум цивилен мирен сервис (форумЗФД) и Центарот за истражување на национализмот и културата (ЦИНИК).