После години запуштеност и неодржуваност, саниран е Музејот на вода во Заливот на коските кај Градиште, еден од најатрактивните и најпосетени локалитети во Охрид. Станува збор за санација за која беа потрошени 15 милиони денари (над 240.000 евра) од буџетот на Завод и Музеј Охрид, рече денеска директорот Горан Патчев.
„Презедовме доста чекори за реставрација на самата инсталација, на изложбениот простор во музејот, санитарните јазли, за системот за наводнување. Седум години не беше ништо вложувано и изминатава година доста интензивно се спроведоа активности“, кажа Патчев.
Музејот на вода е ден од најатрактивните и најпосетени локалитети во Охрид. (Фото: Министерство за култура)
Оваа реплика на праисториска наколна населба на местото наречено Плоча Миќов Град, со 24 куќички од кал и гранки поставени на дрвена платформа изградена на дрвени колци кои излегуваат од Охридското Езеро, со години имаше расклатена и на места скршена ограда, даските на платформата на повеќе места беа раздвоени, клинците штрчеа од спојките.
Министерот за култура и туризам Зоран Љутков рече дека е целосно сменета кровната покривка на сите куќарки, санирана е платформата, и дека ќе се трошат уште пари за целосно обновување на локалитетот.
Градоначалникот на Охрид Кирил Пецаков, министерот за култура Љутков, премиерот Христијан Мицкоски и директорот на Завод и Музеј Охрид, Горан Патчев на денешната посета на Заливот на коските. (Фото: СДК.МК)
Музејот се отвори во 2008, по две години изградба што чинеше 2 милиони евра, а финансираше Министерството за култура, во времето кога Паско Кузман беше директор на Управата за заштита на културното наследство.
Во 2021 година, Министерството за култура даде 500 илјади денари (над 8.000 евра) за санација на оштетувањата на Музејот на вода во Заливот на коските кај Градиште. Тогаш од Охридскиот Завод и Музеј рекоа дека средствата не се доволни за комплетна реконструкција, но ќе се прават најнеопходните зафати за да се подобри безбедноста на музејскиот комплекс.
- ЌЕ СЕ САНИРААТ СКРШЕНИТЕ ДАСКИ И ОГРАДА НА МУЗЕЈОТ ВО ЗАЛИВОТ НА КОСКИТЕ ВО ОХРИД, НО НЕ ЦЕЛОСНО ОТИ НЕМА ДОВОЛНО ПАРИ
- СЕ РАСПАЃА МУЗЕЈОТ НА ВОДА ВО ЗАЛИВОТ НА КОСКИТЕ ВО ОХРИД
Б. НЕСТОРОСКА
