Вечерва во 20 часот, во Музејот на современата уметност во Скопје се отвора ретроспективната изложба на Симон Узуновски (1949-2018), еден од пионерите на уметничките интерактивни инсталации во Македонија. Насловена „Пат за Волкодери – Ретроспектива“, творештвото на Узуновски ќе го претстават историчарите на уметноста Марика Бочварова-Плавевска, Зоран Петровски, Љиљана Неделковска, Валентино Димитровски и Лазо Плавевски, негови блиски пријатели и директни сведоци на неговото делување уште од 1970-ите.

Ќе бидат изложени повеќе од 100 дела, кои вклучуваат објекти, фигурини, колажи, цртежи. асамблажи и апликации изведени со леплива лента или селотејп на стакло или хартија. Неповторливите, ефемерни инсталации, перформанси и акции на Узуновски, во чија изведба вклучуваше голем број луѓе, ќе бидат претставени преку обемна фотодокументација.

„Симе зрачеше со неверојатна животна енергија и ентузијазам, со еден вид афирмативна, привлечна сила, околу која гравитираше нашата генерација. Секогаш беше подготвен да иницира и анимира настани и случки, како во секојдневниот живот, така и во уметноста. Со своите концептуални практики, Симе пополни една празнина во развојот на современата уметност, во време кога на уметничката сцена сè уште беа присутни доцномодернистичките формални образци од претходната деценија“, велат Неделковска и Димитровски.

Со своето уметничко делување, Узуновски отвори сосема поинаков пристап кон сфаќањето на уметноста, со што беа доведени во прашање воспоставените конвенционални јазични и естетски нормативи на традиционалните ликовни дисциплини.

Изложбата во МСУ ќе биде отворена до 25 октомври.

Г. КОНЕВ