„Врба“ на Милчо Манчевски влезе во селекцијата за најдобар филм 2020 на 33. Европски филмски награди, познати и како Европски Оскар, што ги доделува Европската филмска академија (ЕФА), објави денеска Академијата. Во селекцијата на ЕФА за најпрестижната европска награда годинава се 38 филмови.
За филмовите следниве недели ќе гласаат над 3.800 членови на Академијата и ќе изберат по 5 номинации во 5 категории: најдобар филм, режисер, актер, актерка и сценарио. Номинациите ќе бидат објавени на 7 ноември на фестивалот во Севилја, Шпанија. Годинава доделувањето наградите на Европската филмска академија ќе се одржи во Рејкјавик, Исланд на 12 декември.,
Во конкуренцијата со „Врба“ се и новите филмови на Томас Винтерберг, Иштван Сабо, Агњешка Холанд, Кристијан Пецол, Франса Озон, Раду Жуде…
Минатата година, два македонски филмови добија номинации, „Господ постои името ѝ е Петрунија“ на Теона Стругар Митевска и „Медена земја“ на Тамара Котевска и Љубо Стефанов.
Ова е втор пат филм од Манчевски да влезе во селекцијата за европските филмски награди, во 2011 година селектиран беше и неговиот „Мајки“.
„Пандемијата го прекина, но не можеше да го загуши подемот на ‘Врба’ – драмата на Милчо Манчевски“, велат од продукцијата на филмот по најновиот успех на шествиот филм на авторот.
„Врба“ го започна своето патување со светска премиера на Римскиот филмски фестивал во октомври минатата година, каде што беше забележан со исклучително позитивни критики. Пред ковид пандемијата, по македонската премиера филмот играше в кино два и пол месеци и ги сруши рекордите на гледаност во земјата.
Публиката го забележа на низа фестивали, а филмот продолжи да собира одлични критики – Варајети го нарече „суптилен, длабок“, Холивуд репортер вели „те зграпчува, супериорно атмосферски, актуелен и универзален“, за Скрин интернешенел е „трогателен и длабок“.
„Врба“ е добитник на наградите „Хосе Оливеира“ на Фантаспорто во Порто, на Најдобар филм на Велингтон, Нов Зеланд, се прикажа и на фестивалите во Талин, Тајпеј, Пекинг, Истанбул, Сараево, ФЕСТ во Белград, Синеквест во Сан Хосе, Клуж-Напока, Бенгалуру во Индија… „Врба“ неделава ќе го отвори фестивалот во Софија, а ќе го затвори фестивалот во Тирана. Номиниран е и за Најдобар меѓународен филм и за Најдобар режисер на Рејнденс во Лондон.
„Врба“ ги раскажува приказните на три мајки во средновековна и современа Македонија. Играат Сара Климоска, Наталија Теодосиевска и Камка Тоциновски, директор на фотографија е Тамаш Добош, монтажата е на Николас Гастер, продукцискиот дизајн е на Дејвид Манс, а музиката е од Кирил Џајковски. Филмот е македонско – унгарско – белгиската копродукција со учество на Албанија, а продуциран е од Јане Ќортошев и легендарниот британски продуцент Ник Пауел.
