Фармацевтската компанија „Алкалоид“ почна да користи нов објект, кој обезбедува централизирано решение за подготовка и за движење на вработените низ производствените погони во Производство-Фармација. Во објектот има над 900 гардеробни места наменети за вработените.

Вкупната површина на новиот објект изнесува 4.100 квадратни метри, за чија изградба и опремување се вложени 3.8 милиони евра. Покрај сервисните простории, овој нов објект ќе вклучува и изложбени поставки од 88-годишниот историјат на компанијата.

„Комплексноста на оваа инвестициска фаза произлегува од потребата за функционална поврзаност со сите производствени целини на локалитетот – производство и пакување цврсти, полуцврсти и течни фармацевтски форми – кај кои се практикува различен пристап во процесите, при што вработените добиваат уште подобри услови за безбедна работа“, велат од „Алкалоид“.

Новиот објект ќе вклучува и изложбени поставки од 88-годишниот историјат на компанијата. (Фото: „Алкалоид“)

Од 2017 до 2023 „Алкалоид“ има пуштено во употреба 10.720 квадратни метри и има инвестирано 18,6 милиони евра на локалитетот во „Автокоманда“. Од 2017 наваму има пуштено во употреба неколку нови фармацевтски капацитети, кои вклучуваат: погон за производство на полуцврсти фармацевтски форми (масти, кремови и гелови), погон за пакување лекови, вагална за мерење суровини и магацински простор за складирање суровини.

Наскоро, „Алкалоид“ планира заокружување на уште еден нов крупен инвестициски потфат – Таблетно одделение 2.0 – чија цел ќе биде диверзификација и значително зголемување на производствените волумени за цврсти фармацевтски форми.