Фејсбук дозволува неонацистички групи да останат на мрежата, бидејќи било утврдено дека тие не ги прекршуваат стандардите на заедницата. Иако страниците на меѓународни расистички организации како „Комбат 18“ и „Мизантропик дивижн“ биле пријавувани, Фејсбук одбивал да ги тргне и ги советувал своите корисници едноставно да не ги следат тие страници, ако ги сметаат за „навредливи“.

Според извештајот на проектот „Каунтер екстремизм“ (ЦЕП), Фејсбук исто реагирал и за една американска расистичка група и за Британското неонацистичко движење.

„Комбат 18“, која има фракции во десетици држави, вклучувајќи ги и Грција и Австралија, беше осомничена за убиства на имигранти и на припадници на етнички малцинства.

ЦЕП следеше 40 Фејсбук страници на десничарски екстремистички групи и било утврдено дека 22 од нив промовираат неонацистичка идеологија и бел расизам. Во меѓувреме, само пет од нив снемало од непознати причини, а на останатите 35 дури им се зголемил бројот на фановите.

„Фејсбук и останатите платформи им дозволуваат на ваквите групи да ја шират својата мрежа низ цел свет. Фејсбук има 2,3 милијарди корисници и сè додека не видиме сериозен притисок од јавноста против десничарскиот екстремизам, нема да има значителен напредок на ова поле“, вели Ханс-Јакоб Шиндлер, извршен директор на „Каунтер екстремизм“.

Иако Фејсбук и другите мрежи успешно се имаат справено со пропагандата на Исламска држава и на други исламистички групи, истото не се случува и со десничарскиот екстремизам.