Јапонски министер задолжен за сајбербезбедност ја шокираше јавноста со признанието дека никогаш не користел компјутер во својот професионален живот и, исто така, покажал збунетост од концептот на УСБ.

Шеесет и осумгодишниот Јошитака Сакурада е шеф на владиниот оддел за сајбербезбедност и министер задолжен за организација на Летните олимписки игри во Токио во 2020 година. И покрај овие функции, тој во парламентарна дебата призна дека никогаш не користи, ниту работел на компјутер.

„Уште од моја 25-годишна возраст не користам компјутер лично, туку давам инструкции на мои вработени и секретарки“, кажа Сакурада.

Тој исто така бил збунет кога го прашале дали во јапонските нуклеарни централи се користат УСБ-приклучоци.

„Неверојатно е што некој кој никогаш не допрел компјутер се грижи за нашата сајбербезбедност. Тој дури не знае што е УСБ. Ако го нападнат хакери, ќе му ги украдат сите информации“, изјави опозицискиот пратеник Масато Имаи.