Во фоајето на Народниот театар „Јордан Хаџи Константинов-Џинот“, јавноста за првпат можеше да види оригинално дело на македонскиот зограф и сликар Ѓорги Зографски.

Делото е портрет на Манче Данов од Велес, попознат како Манче кујунџијата и е во сопственост на семејството Манчеви. Делото на Зографски, кое долги години стоело во дуќанот под Саатот, го претстави Елица Николова, кустос-историчар на уметност од Народниот музеј во Велес.

„Зографски водел сметка да ги претстави своите мецени што подостоинствено. Делото е со максимално доловување на физичкиот изглед на портретираниот. Обработката на лицето има примарно значење. Неговите дела имаат повеќекратна вредност – уметничка, културно-историска, документарна“, рече Николова.

Таа порача дека на делото му се неопходни итни конзерваторско-реставраторски интервенции, а потоа да биде откупено од страна на надлежните институции.

Зографски, според проценките на стручните лица, нацртал околу 40 портрети, а 30-ина од нив се познати на јавноста. Тоа се главно видни трговци и еснафи, кои материјално добро стоеле, сакале да се овековечат, но и да ја помогнат егзистенцијата на Зографски. Меѓу нив се портретите на тогаш познатите добротвори од Велес, Димче Чокал, Михаило Чекардеков, Диме Јовев, Петар Здравев и Андреа Коробар.

П. ПЕЧКОВ