Лицата со интелектуална попреченост од Струмица излегоа на улица за да ги продаваат велигденските експонати што ги изработувале со своите родители, а со парите да набават матЕријал за изработка на други творби за во иднина. Со помош на своите родители и едукатори членовите од ЦПЛИП „Порака“ од Струмица паралелно изработуваа и велигденските украси на лице место. Лепеа коноп, боеја украси, нижеа монистри и украсуваа јајца, а пак со нивните родители на посебен штанд ги продаваа на струмичани честитајќи им ја Лазарова сабота.

Повеќе од стотина украси изработени до текстил, метал, хартија, трева беа понудени во центарот на градот, каде струмичани можеа да купат експонати во пресрет на Велигденските празници. Соња Сачевска од „Порака“ кажа дека се купувале експонатите, чија што цена се движеше од 100 до 200 денари за парче. Но, таа и останатите родители кои учествуваа во акцијата кажаа дека многу ги боли кога минувачите ќе ги пофалиле, но не купувале.

„Срце ми се кине кога ќе застанат и ќе ги видат експонатите, ќе нѐ пофалат, ама не купуваат. Не знам, можеби зборувам како мајка на дете со интелектуална попреченост кое се трудело и да изработи некој експонат. Тие просто се радуваат кога некој ќе им купи нешто што сработиле. Инаку средства што добиваме од продажбата ќе набавиме дидактичка опрема, но и материјали кои ќе ги користиме за изработка на експонати за Струмица опен фестивалот“, вели Сачевска која апелираше до сите да немаат предрасуди кон овие лица со различности.

Како што информираа од Центарот „Порака“, велигденски експонати ќе се продаваат и во текот на следната недела и преку изложувањето на рачните изработки тие ќе ја пренесуваат пораката за локална заедница без предрасуди и прифаќање на различностите.

Лицата со интелектуална попреченост во Струмица во својот клуб континуирано изработуваат експонати и украси кои за поголеми празници или манифестации сами ги изложуваат и ги продаваат на заинтересираните граѓани.

В. ТРАЈКОВ