„Маркс енд Спенсер“ не смее да ја урива и преуредува својата препознатлива продавница во централен Лондон, откако државниот секретар ги блокираше ваквите планови. Компанијата сакаше да ја замени својата зграда во арт деко стил на улицата Оксфорд со нова продавница и голем деловен блок.

И покрај силната опозиција, советот на Вестминстер претходно ја одобри шемата, која потоа беше запрена од владата. Шефот на „Маркс енд Спенсер“, Стјуарт Мачин, ја опиша одлуката како чин на самосаботажа.

Мачин најави дека продавницата би можела да ја напушти својата сегашна локација на светски познатата шопинг улица.

„Од почеток ни беше јасно дека не постои друга остварлива шема, така што по речиси еден век, ‘Маркс енд Спенсер‘ нема избор освен да ја преиспита својата иднина на улицата Оксфорд по желба на еден човек. Тоа е патетично“, изјави Мачин.

Компанијата сакаше да изгради нова модерна продавница во рамките на десеткатниот компекс, сметајќи дека сегашната зграда се распаѓа. Место тоа, властите донесоа одлука за обнова на зградата од 1929 година.