Гостиварскиот портал Гостиварпрес од пред два месеца воведе можност информациите кои ги објавува на електронското издание да станат достапни и во аудиоформат. Но, наместо новинари спикери информациите ги читаат Марија и Марко, гласови создадени со вештачка интелигенција (ВИ).

Од Гостиварпрес велат дека не е некоја новина порталите да воведат и аудиоформат на пренесување на информациите, но за првпат на Балканот се користи ВИ како презентер на вести.

„Во Македонија, а и на Балканот, Гостиварпрес е единствен портал што користи ВИ за секојдневно читање на вестите. На нашиот сајт покрај пишаниот облик на веста постои опција истата да се добие и во аудиоформат. Ова за публиката се покажа доста привлечно, добивме многу позитивни коментари. Според нашите анализи изминатите два месеца откако го имплементиравме овој начин на пренесување на информациите, 60 до 70 отсто од посетителите, освен што ги читаат вестите, ја слушаат и нивната аудиоверзија. Оваа новина што ја воведовме посебно беше поздравена од лица со оштетен вид, како и од постарите лица на кои им е тешкода ги читаат ситните букви на нивните мобилни телефони. На сите нив им го олеснивме пристапот до информации на едноставен начин“, вели Љупка Антеска, новинарка во редакцијата.

Освен аудиоформатот на вестите, другата новина што ја воведе Гостиварпрес е таа што вестите ги читаат двајца „спикери“, Марија и Марко, за чии гласови се производ на ВИ. Гласовите на Марија и Марко се милозвучни, пријатни за слушање, имаат добра дикција и многу тешко може да се забележи дека станува збор за гласови создадени со помош на ВИ. Тоа не го забележале ниту гостиварци кога започнало емитувањето на аудио вестите.

Гласовите на Марија и Марко се милозвучни, пријатни за слушање, имаат добра дикција и многу тешко може да се забележи дека станува збор за гласови создадени со помош на ВИ. (Фото: Гостиварпрес)

„Пред сѐ сакавме да ги следиме новите трендови што се сега во медиумите и да направиме нешто ново и нешто што ќе овозможи веста да биде достапна во секое време и за сите луѓе. Едноставно сакавме да направиме нешто поинтересно и поинаку од вообичаеното. Го набавивме потребниот софтвер, но на почетокот, кога ја воведовме опцијата вестите да се следат во аудиоформат, а кои ги читаа нашите ‘спикери’ Марија и Марко, како ние им ги дадовме имињата. На почетокот не кажавме дека тоа се гласови создадени од ВИ. Првин добивме убави зборови за опцијата што сме ја вовеле, им се допаднаа гласовите на Марија и Марко, но најмногу нé прашуваа кои се тие млади спикери кои толку убаво читаат. Кога подоцна кажавме дека тоа не се живи луѓе, туку дека се работи за посебен софтвер-генератор на глас, првин беа зачудени но брзо ја прифатија оваа новина. Така Марија и Марко беа прифатени како реални личности и така станаа дел од нашата редакција. Инаку, ова е прв ваков проект во Македонија каде вештачката интелигенција се користи во медиумското работење, односно за говорно читање на вести и информирање со помош на ВИ на македонски јазик применувајќи кирилично писмо, што не прави особено горди. Развиено во соработка со компанија од САД, дел од иницијативата – Иновативни производи и пристапи за зголемување на медиумската писменост, за што нашиот медиум доби награда во проектот ‘Култивирање на локални независни медиуми во Западен Балкан’, вели Антеска.

Бидејќи ВИ сѐ повеќе навлегува во медиумската сфера, се поставува прашањето за опасноста ВИ утре во целост да го замени новинарот.

„Факт е дека можностите на ВИ се големи и секојдневно се прошируваат, но сепак сметам дека не може да ги замени новинарите се додека тие развиваат критичка мисла, прават анализа, прибираат информации и податоци од терен…сé она што ВИ не го може“, смета новинарката Антеска.

Сепак, колку и да се совршени овие програми сé уште се во развој па може да се јават и мали проблеми, но кои лесно се решаваат.

„Во однос на предизвиците со кои се соочивме кога Марија и Марко ги читаат информациите, е што на македонски јазик при читање на кратенките се чувствува сецкање во гласот. Некои знаци и бројки ВИ не може веднаш да ги препознае па треба тие да се преформулираат, односно да се напишат со букви и такви некои ситни детали. Но, еве ќе кажеме дека Марија и Марко се трпеливи, вредни и постојано учат и се усовршуваат“, вели Антеска.

З. АНДОНОВ