Сузана Спасовска беше ревијална гостинка на фестивалот Охрид фест, вчера на сцената на „Долни Сарај“ во Охрид. Првенката на ансамблот „Танец“ која речиси 40 години е една од најголемите ѕвезди во фолк музиката, вели дека е горда што учела од легендите на македонската народна музика. Спасовска се сети на една анегдота со легендарната пејачка Петранка Костадинова, која загина во 2002, кога биле на заедничка турнеја во Австралија. За Костадинова, Спасовска вели дека ѝ била како мајка.

„Сум била на многу турнеи со многу наши легенди, со Јонче Христовски, со Симеон Гугуловски, со Петранка Костадинова. На турнеја во Австралија сум била 22 пати. На една таква турнеја со Петранка, бевме на пазарење во еден трговски центар, и јас видов едно палто со светкави камења. Тоа палто беше многу познато во тоа време и сите ме прашуваа од каде ми е. Ѝ реков: ‘Петранче, јас од овде не се помрднувам, без ова палто не си одам дома. Таа ме убедуваше да си одиме зашто палтото е скапо, но ѝ реков дека морам да си го купам и бев упорна. Кога влеговме во бутикот, видов дека чини 1.000 долари, а јас во мене имав само 800. Ја замолив Петранка да ми позајми 200. По десетина минути убедување, таа попушти и ми даде 200 долари на заем кои во Скопје ѝ ги вратив. Петранка ме караше и кога се вративме дома што потрошив толку пари, како вистинска мајка. Но, никогаш не зажалив што дадов толку за тоа палто, го носев на оние мои познати концерти во Универзалната сала, и таа облека беше вистинска атракција. Петранка многу се радуваше за успехот на тие мои концерти“, ни рече Спасовска. Отсекогаш, таа се трудела да биде уникатна со облеката и со имиџот кој често го менуваше. Вели дека тоа е еден од клучните моменти за нејзиниот успех кога била помлада. Облеката што ја носела тогаш уште ја чува, дел во нејзиниот стан, дел кај мајка ѝ која порано ѝ ги шиеше фустаните.

Петранка Костадинова загина во сообраќајка во 2022 (Фото: Фејсбук)

„Размислувам да направам изложба со сета облека која ја носев порано. И кога младите пејачи ми бараат совет како да успеат, им велам да бидат свои и уникатни. Да не се обидуваат да ме имитираат ниту мене, ниту било кои други нивни колеги, иако се радувам што сум им дала убав пример. Уникатноста е клуч за успех. Јас сакам се менувам од почетокот на мојата кариера, сакам трансформации, и не знам што сѐ ќе донесе иднината“, вели Спасовска.

Како првенка на ансамблот „Танец“ вели дека имале многу турнеи минатата сезона, а еден од највепачтливите настапи им бил во Осака, во Јапонија.

„Дел од ансамблот во мај беше на Експо во Осака, како пејач бев јас и толку беше убаво што ни остануваше уште. Јапонците прекрасно реагираа на нашата традиционална музика. Со нас беше нашиот пријател, пејачот Казухиро Котецу, кој ја пее и ја негува македонската музика. Со него сме многу блиски и соработуваме долго“, вели Сузана Спасовска.

Пејачката додава дека ѝ е драго што нејзината внука Клара која во октомври ќе наполни пет години е многу музикална.

М. ЏАРОВСКА