Руџеро Деодато, режисерот на озлогласениот хорор „Канибалски холокауст“, почина на 83 години, објавија италијанските медиуми.

Деодато сними 20-ина филмови во кариерата долга над пет децении и се испроба во повеќе жанрови, но остана најпознат по бруталниот хорор филм од 1980, кој беше забранет во повеќе земји, а самиот тој беше тужен за убиство на своите актери.

„Канибалски холокауст“ (Cannibal Holocaust) важи за пионерско дело на псевдодокументарниот жанр и наводно се базира на снимки пронајдени од експедицијата на филмот во амазонската џунгла. Филмот стана озлогласен по вистинското насилство врз животни, што вклучува убивање мајмуни, како и по прикажувањето на екстремно насилство и мачење.

Набргу по неговото објавување во Италија, филмот беше запленет од локалните власти, а Деодато беше обвинет за недоличност и убиство, што беше отфрлено во 1984.

Иако филмот беше забранет во повеќе од 50 држави, тој беше инспирација за режисери како Ели Рот, Квентин Тарантино и Оливер Стоун.