Иво Лауренчиќ, основоположникот на современата македонска креативна и маркетинг индустрија, постхумно го доби специјалното признание „Креатори за столетијата“ за особен придонес во промоцијата на претприемништвото во Централна и Југоисточна Европа.
Престижната награда која ја добиваат најзаслужните за развојот на претприемништвото беше доделена во рамките на Самитот на претприемачите од регионот – „300 Најдобри“, што викендов се одржа во Дубровник, Хрватска.
За доделувањето на наградата одлучува меѓународен комитет од 13 членови, составен од независни експерти од областа на економијата, менаџментот, маркетингот и претприемништвото од Хрватска, Словенија, Србија, БиХ, Македонија, Германија, Австрија и Швајцарија.
Иво Лауренчиќ, кој почина во 2013 година е основач на првата маркетинг-агенција во независна Македонија „Идеа Плус“. Во текот на својата богата професионална кариера создаде над 300 комуникациски проекти и над 400 видеоформи во филмската и креативната индустрија, како и креативни и макретинг кампањи за некои од најпознатите домашни и светски брендови и компании. Меѓу останатите проекти, Лауренчиќ е креатор и на првиот промотивен филм за туристичките потенцијали на земјата „Ден во Македонија“, како и на серијалот „Говорете македонски“. Беше и креатор и реализатор на кампањата за промоција и зачувување на македонското кирилично писмо „Додека пишувам на кирилица постојам“.
Сакајќи да ги поттикне и другите уметници и креативци да создаваат свои сопствени дела ја режираше култната театарска претстава „Кутрите мали хрчки“, како и серијата „Од денес за утре“ која се емитуваше во Македонија во 16 епизоди.
Во негова чест, во 2014-та година е формирано „Движењето за поддршка на креативноста Иво Лауренчиќ – „Браво сине!“, чија цел е поттикнување и поддршка на талентот и креативноста кај младите во функција на создавање силни национални брендови, што претставуваше и една од неговите основни животни мисии.
