Актерската легенда Роберт де Ниро го доби седмото дете на 79 години. Веста ја потврди и неговиот публицист, додавајќи дека нема да се објавуваат други детали, меѓу кои и името на мајката.

На премиерата на својот нов филм „За татко ми“ (About My Father), Де Ниро збореше и за тоа како е да се има ново бебе.

„Секогаш е убаво и мистериозно и не знаеш што сè може да се случи“, кажа тој.

Де Ниро има две деца од првиот и две деца од вториот брак, како и близнаци од врската со актерката и манекенка Туки Смит, кои сега се на возраст од 51 до 11 години. Веќе неколку години е во романтична врска со Тифани Чен. Минатиот месец, папараците снимија слики со Де Ниро и Чен (со труднички стомак) како излегуваат од ресторан во Санта Моника со Били Кристал и Харви Кајтел.