Два дена по ослободувањето на Битола, на 6 ноември 1944, борците на Седмата ударна бригада, сакајќи што побрзо да се чуе слободна македонска песна, под диригентство на Тодор Скаловски приредиле музичка програма. Тоа се смета за почеток на постоењето на Културно-уметничкото друштво (КУД) „Стив Наумов“ од Битола, кое има најдолга традиција во Македонија и вчера прослави 80 години постоење. Во негови рамки опстојува еден од најпознатите и најнаградувани хорови во Македонија, кој 60 години функционираше под диригентската палка на маестро Љубо Трифуновски.
„Имав добри хорови и ансамбли. Кога ќе напишеа со молив композиција, дали бил тоа Гајдов, Скаловски или Властимир Николовски, ми ги пуштаа по пошта, за јас да ги изведам прво со Хорот. Тодор Скаловски беше еден од најголемите композитори во Македонија и на поранешните југословенски простори. Толку убави композици пишуваше што кога ќе одевме на гостувања во странство, луѓето ги читаа партитурите и велеа како може човек да го напише ова. Кога овие композитори поради возраста престанаа да пишуваат, јас морав да правам некои преработки. Во текот на овие 60 години во друштвото составив околу 46 композиции“, рече Трифуновски.
Хоровите и мандолинскиот оркестар на КУД „Стив Наумов“ во изминатите години го пропатуваа светот, ширејќи ги македонските култура и уметност. Добитници се на голем број домашни и меѓународни награди. Покрај мешаниот хор, голем успех имаше и Женскиот младински хор, кој со децении ги збираше најдобрите битолски вокални интерпретаторки, од кои дел денес се и познати пејачки.
„Во 1971 го формирав Женскиот хор. Бев наставник по музика и го водев и хорот во основното училиште ‘Коле Канкински’ во Битола. Ученичките кои завршија отидоа во гимназија и кога ќе ме сретнеа низ Битола, ми велеа: ‘Професоре, ајде да се собериме, не можиме без хор’. Ми падна жал и им реков, сабота во 12 часот. Се собраа околу 30 хористки и ние можевме тој ден да имаме цел концерт. Женскиот хор беше најдобар во Македонија и земаше награди низ цел свет“, се присетува Трифуновски.
Хоровите во КУД „Стив Наумов“ досега ги воделе 13 успешни диригенти, а последниве четири години за првпат диригира жена, професорката по хор и диригирање Лилјана Трајковска-Димевски. Мешaниот хор неодамна освои трета награда на Интернационалниот хорски фестивал во Херцег Нови, Црна Гора, што се одржа во октомври.
На свечената академија одржана вчера беа доделени плакети на битолчани кои 40 и повеќе години пееле и настапувале со хорот.
Ж. ЗДРАВКОВСКА
