Сопругата на германскиот режисер Вим Вендерс, фотографката Доната Вендерс, носеше фустан изработен од стари видеоленти од филмовите на нејзиниот сопруг на синоќешното отворање на 76. издание на Берлиналето. Вим Вендерс е претседател на жирито за Златна мечка на годинешното Берлинале.
Фустанот беше изработен од видеоленти од филмовите „Париз, Тексас“ и „Небото над Берлин“.
„Што е посоодветно за еден филм фестивал од тоа да носиш фустан направен од филмовите на Вим. Плус, толку е удобен за носење,“ изјави Доната Вендерс во соопштение објавено од берлинскиот бренд за одржлива мода „Круба“, кој го изработи фустанот.
Пред две години, Доната Вендерс носеше фустан направен од видеоленти и на доделувањето на Оскарите.
„Материјалот носи историја, емоција и дел од културата“, изјави дизајнерката Мира вон дер Остен. Материјалот прекрасно си игра со светлината. Беше задоволство да ја облечам Доната Вендерс во филм и да ја промовирам одржливоста на црвениот тепих“.
Берлинале се затвора на 22 февруари.
