Научници од Универзитетот Глазгов Каледонија развија уникатна слушалка во вештачка интелигенција (ВИ) која може да предвиди епилептични напади неколку минути пред да се случат. Уредот ги анализира мозочните бранови и срцевата активност, овозможувајќи навремено предупредување за пациентите да преземат мерки и да избегнат повреди.

Моментално не постои широко достапен уред што нуди вакви рани предупредувања, иако милиони луѓе живеат со епилепсија. Истражувачите сметаат дека слушалката може значително да го подобри управувањето со состојбата и да им даде поголема самодоверба и независност на пациентите.

Системот е трениран со илјадници часови ЕЕГ и EЦГ податоци и користи вештачка интелигенција за препознавање суптилни сигнали што најавуваат напад. Постигнува точност до 95% и може да го прикаже нивото на сигурност на предвидувањето.

„Обезбедувањето дури и неколку минути предупредување може да го промени животот. Нашата цел е да им дадеме на пациентите и нивните семејства време да реагираат, да останат безбедни и да живеат понезависно“, изјави професор Хади Ларијани, кој го предводи истражувачкиот тим на Универзитетот Глазгов Каледонија.

Тој изјави дека слушалката е „многу уникатна“ и дека се надеваат еден ден да ја пуштат како уред за носење, сличен на капа.

„Сакаме да биде што подискретна, безжична и лесна – тоа се многу карактеристики кои ниту еден од постојните уреди во моментов ги нема“, додаде тој.

Слушалката е замислена како лесен, безжичен и дискретен уред, сличен на капа, погоден и за деца. Иако првичните прототипи користат постоечка хардверска опрема, тимот планира да развие сопствен модел.

Поради строги регулаторни процедури за медицински уреди, ќе поминат уште неколку години пред уредот да биде комерцијално достапен, но почетните тестирања покажуваат дека технологијата е изводлива и ветувачка.