Бензините од полноќ поскапуваат за три и пол денари по литар, додека малопродажната цена на дизелот се намалува за два денари, одлучи денеска Регулаторната комисија за енергетика, водни услуги и услуги за управување со комунален отпад.

Со најновата одлука, новата цена на Еуросупер БС-95 ќе изнесува 100,50 денари за литар, додека Еуросупер БС-98 ќе се продава по 102,50 денари за литар. Цената на Еуродизел БС се намалува на 99,00 денари за литар.

Со овие измени се врши зголемување на малопродажните цени на нафтените деривати во просек за 2,86 отсто во споредба со цените утврдени на 7 септември.

Во пресметката е вклучена и одлуката на Владата од 13 септември за примена на повластена даночна стапка, со која износот на данокот на додадена вредност за горивото Еуродизел е намален на 10 отсто.

Ценовните промени стапуваат на сила со денот на донесувањето, а ќе почнат да се применуваат од 00:01 часот на 15 септември.