Владата нема да го прифати т.н. француски предлог со отворени раце и без испорака од страна на Европската Унија и Бугарија, кажа премиерот Христијан Мицкоски на одбележувањето на 11 Октомври – Денот на народното востание во Прилеп. Тој побара јасни гаранции од Европскиот совет дека нема проблем со македонскиот идентитет, јазик и култура, како и Бугарија да ги спроведе пресудите од Судот за човекови права во Стразбур за правата на Македонците.

„Никој нема право да очекува дека оваа Влада која што јас ја предводам ќе го прифати т.н. француски предлог со отворени раце и дека без било каква испорака од страна на нашиот источен сосед и ЕУ ние тоа ќе го испорачаме. Тоа нема да се случи“, рече Мицкоски.

Како што кажа, патот кон ЕУ за Македонија не бил и нема да биде фер, но тоа не значи откажување од стратешката цел. Тој побара Европскиот совет уште на следниот самит да усвои заклучок со кој јасно ќе се каже дека ниту една од 27-те земји членки нема проблем со посебниот македонски идентитет, кодифицираниот македонски јазик и повеќевековната македонска култура и традиција.

„Да речат доста е, нема повеќе вето и препреки поради билатералните прашања, а нашиот источен сосед мора да покаже европска зрелост, не од времето на живковизмот, туку од времето на Аденауер, Де Гаспери и Шуман. Да го почитува тоа што го потпишале, а тоа е меѓународното право, а меѓународното право вели дека пресудите од Судот за човекови права во Стразбур треба да се имплементираат. Конечно Македонците во западна Бугарија, во Пиринскиот дел од Македонија, да го добијат тоа што го заслужуваат. Тоа се црвените линии“, нагласи премиерот.

Мицкоски го критикуваше односот на претходната власт, која, како што рече, игнорантски и себично го прифати предлогот, а сега, вели тој, се обидува да црта црвени линии.

Покрај евроинтеграциите, Мицкоски зборуваше и за правосудството, велејќи дека тоа е „во канџите на поранешни политичари“ и вети „ресет на системот“ без реваншизам, каде правдата ќе биде еднаква за сите.