Телата на двајцата македонски планинари се извлечени од врвот Кајмакчалан и се симнуваат кон скијачки центар во Грција, објави државната агенција МИА, повикувајќи се на извори од грчката противпожарна служба. Двајцата планинари од Македонија загинале на врвот Кајмакчалан на планината Ниџе во Грција, најверојатно по пад во бездна.

Станува збор за 25-годишна девојка и 35-годишен маж. Од Дирекцијата на Центарот за заштита и спасување во Битола соопштија дека педесетина млади планинари од Скопје биле на прошетка на планината во Грција на потегот од Лутраки кон Кајмакчалан. Вечерта од нив 48 се вратиле, а двајца не.

Грчката противпожарна служба, вчера добила повик за помош и од 14.30 часот, започнала спасувачката акција со три возила и 13 спасувачи. Доцна во ноќта, планинарите биле лоцирани во непрооден дел, но не давале знаци на живот. По лоцирањето на местото каде што паднале двајцата планинари, од рано утрово, траеше акцијата на грчките пожарникари за извлекување на телата на планинарите.