Ќе почнам со решавање на сообраќајниот хаос на скопскиот Клинички центар „Мајка Тереза“, рече денеска на првиот брифинг со медиумите, новиот министер за здравство Фатмир Меџити.
Меџити е доктор невролог со 22-годишно искуство на Клиниката за неврологија, и рече дека е запознаен со сите проблеми и на медицинските работници, но и на пациентите, бидејќи како што рече, и сам себе, и членовите на своето семејство ги гледа како пациенти кои имаат потреба од здравствени услуги.
Меџити кажа дека откако е на функцијата од минатата недела, секојдневно е на состаноци со директори, советници, експерти од сите области, како и со министри и побара за трпение од јавност пред да почне да излегува со официјални измени, именувања и информации.
Министерот најави дека по 10 години, ќе се промени позитивната листа на лекови, и дека ќе се формира Тријажен ургентен центар на Клиниката, кој би бил во околината на Интерните клиники.
„Со тоа конечно сакаме да се реши проблемот и пациентите кои доаѓаат за итна интервенција да не лутаат од клиника на клиника“, рече Меџити, кој на брифингот дојде со заменик-министерката за здравство д-р Маја Манолева и дел од советниците. Додаде дека сѐ уште работи на тимот кој ќе работи со него.
Б. НЕСТОРОСКА
