МИЈАЛКОВ ПОВРАЌАЛ, НЕ ДОЈДЕ НА СУДЕЊЕТО ЗА „ТРЕЗОР“ ЗА БРИТАНСКАТА ОПРЕМА ЗА ПРИСЛУШУВАЊЕ

    МИЈАЛКОВ ПОВРАЌАЛ, НЕ ДОЈДЕ НА СУДЕЊЕТО ЗА „ТРЕЗОР“ ЗА БРИТАНСКАТА ОПРЕМА ЗА ПРИСЛУШУВАЊЕСпоред извештајот од болницата „Систина“, ексдиректорот на УБК повраќал, имал покачена телесна температура, болки и подригнување. - Мијалков на судење за случајот „Тврдина-Таргет“ (Фото: СДК.МК)

    Обвинетиот во „Трезор“ Сашо Мијалков за незаконска набавка на британската прислушна опрема за УБК, не дојде на денешниот распит, поради проблем со желудникот.

    Според извештајот од болницата „Систина“ што го прочита во Основниот суд Скопје 1 судијката Џенета Бегтовиќ, поранешниот директор на УБК повраќал, имал покачена телесна температура, болки и подригнување, за што од 25 септември 2019 година му е препорачано домашно лекување и терапија.

    Но сепак, Бегтовиќ закажа рочиште за „Трезор“ за три дена, за да не почнува судењето отпочеток, бидејќи ќе поминат 90 дена од последното. Во меѓувреме, таа најави дека ќе провери во каква здравствена состојба е Мијалков.

    Во овој предмет на поранешното СЈО, обвинети покрај Мијалков се Горан Грујевски, Тони Јакимовски и Небојша Стајковиќ. Тие се обвинети за незаконско прибавување на 820 илјади евра преку набавка на електронска комуникациска опрема од фирма од Велика Британија.

    Големата сума пари од МВР, односно од државниот Буџет, легнала на сметката на фирмата „Финзи”, чиј сопственик Коста Крпач беше најден застрелан дома во април 2016, за време на предистражната постапка за незаконски присвоените 820.000 евра преку неговата фирма.

    Крпач, кога беше најден мртвот, бил сведок на Специјалното обвинителство. Претходно, него го помилува претседателот Иванов.

    С. К. ДЕЛЕВСКА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира