ОБВИНИТЕЛСТВОТО ЌЕ БАРА ПРИТВОР ЗА СУДИЈАТА ТЕОФИЛОВСКИ, ЧЛЕН НА СУДСКИОТ СОВЕТ, ДРЖАВАТА ЈА ОШТЕТИЛ ЗА 860.000 ЕВРА

    ОБВИНИТЕЛСТВОТО ЌЕ БАРА ПРИТВОР ЗА СУДИЈАТА ТЕОФИЛОВСКИ, ЧЛЕН НА СУДСКИОТ СОВЕТ, ДРЖАВАТА ЈА ОШТЕТИЛ ЗА 860.000 ЕВРАСудијата Зоран Теофиловски и седуммина службени лица од Општина Тетово и од други институции, со лажни податоци за наводен изграден објект на поранешното тениско игралиште, успеале да го приватизираат и легализираат по багателна цена, ни по евро за квадрат. (Фото: СДК.МК)

    Истрагата во која е првоосомничен и сè уште се бара Зоран Теофиловски, член на Судскиот совет на РСМ, е отворена од Обвинителството за организиран криминал против вкупно 8 лица.

    Кон крајот на август 2011 година првоосомничениот (Зоран Теофиловски н.з.), како тогаш одговорно лице – Претседател на спортско здружение од Тетово, за да изврши незаконски упис на право на сопственост, поднел лажни докази и така почнал постапка за легализација на државен имот. Кон Барањето за утврдување на правен статус на непостоечки објект, до Општина Тетово, приложил нотарски заверена изјава со која лажно изјавил дека станува збор за објект изграден во 1995 година и геодетски елаборат изготвен од второосомичениот во кој е прикажан непостоечкиот објект во површина од 122 м2.

    На почетокот на 2012 година, постапувајќи по поднесеното барање две од осомничените лица како членови на надлежната Комисија, со неизвршување на својата службена должност, извршиле увид на местото. Изготвиле записник, внесувајќи невистинит податок дека на парцелата постои бесправно изграден објект што претставува градежна и функционална целина.

    Подоцна, третоосомничениот, со искористување на својата службена положба и овластување, иако знаел дека постојат правни пречки за издавање на урбанистичка согласност и продолжување на постапка за утврдување на правен статус за непостоечки бесправно изграден објект, изготвил и потпишал Урбанистичка согласност на име на непостоечко правно лице, со оглед на тоа што правниот наследник на спортското здружение е регистриран во Централниот регистар на РМ три месеци по донесување на урбанистичката согласност.

    Веќе во декември 2012 третоосомничениот изготвил и потпишал Решение за утврдување на правен статус на бесправно изграден објект. Во меѓувреме, кога постапката за легализација се уште не била завршена со правосилен акт, шестоосомничениот во својство на службено лице – управител на Друштвото за спортски активности, со намера да прибави противправна имотна корист за правното лице, поднел Барање за купување градежно земјиште сопственост на државата.

    Со барањето приложил Извод од ДУП што по негово барање противзаконски бил изготвен од страна на третоосомничениот кој внел невистинити податоци во планот.

    Постапувајќи по Барањето за приватизација, административен службеник е осомничен дека извршил увид на предметната парцела и со искористување на својата положба и овластување изготвил Записник, внесувајќи невистинити податоци, по што предметот го доставил на понатамошно постапување. По добивање на Записникот, осмоосомниченото лице, постапувајќи по предметот, наместо да го одбие заради неисполнување на законските услови за приватизација на градежно земјиште во државна сопственост, без Извод од урбанистички план и без донесен ДУП, изготвило Решение за приватизација на градежното земјиште.

    На овој начин осомничените овозможиле правното лице да се стекне со право на сопственост на градежно земјиште со површина од 4.410 м2 откупувајќи го по цена од 43,00 денари за 1м2 или во вкупна вредност од 188.307,00 денари , а на штета на средства на Буџетот на РСМ во висина од 52.920.000,00 денари, или 860.000 евра.

    Обвинителот што постапува по предметот во текот на денот до Судијата на претходна постапка при Основниот кривичен суд ќе достави предлог за определување мерка притвор за шест осомничени и мерки на претпазливост за две осомничени лица, се најавува во соопштението на ОЈО за организиран криминал и корупција.

    С. К. ДЕЛЕВСКА

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира