Од 1 јули, вработените во скопскиот Клинички центар „Мајка Тереза“ ќе може да паркираат во „Лимак“, најави денеска министерот за здравство Азир Алиу. На скопските клиники дневно циркулираат 6 илјади пациенти, а има над 2.500 вработени.

„Потпишавме меморандум со ‘Лимак’ со кои обезбедуваме 300 паркинг места за вработените, таму има 24 часат пристап. Парингот е на 5 минути пешачење. Таму ќе има табли поставени кои спратови се обезбедени за вработените во здравствените установи. Тие ќе плаќаат за паркирањето таму, плаќаат и сега“, кажа Алиу на денешната прес-конференција додавајќи дека уште  немаат методологија како да ги натераат вработените таму да паркираат.

Министерот најави и дека во рамки на Клинички центар ќе бидат поставени интерактивни информтивни табли на кои, на пример, ќе има информации колку паркинг места има пред одредена клиника, или каде точно е одредена институција.

Алиу кажа дека паркингот не е ни мапиран каде да се паркира кола и дека прават анализа колку пациенти ги користат паркинг местата, колку вработени има. Долгороченото решение за паркингот ќе зависи од долгорочното решение за Клиничкиот центар.

Б. НЕСТОРОСКА