ОМБУДСМАНОТ РЕАГИРА ЗА ПРИВЕДУВАЊЕТО НА ПРАТЕНИЦИТЕ МУКОСКИ, ПЕШЕВСКА И АРНАУДОВ

    ОМБУДСМАНОТ РЕАГИРА ЗА ПРИВЕДУВАЊЕТО НА ПРАТЕНИЦИТЕ МУКОСКИ, ПЕШЕВСКА И АРНАУДОВПратеникот Крсто Мукоски беше донесен во Кривичниот суд на 28 ноември без лисици на рацете, но некои медиуми објавија дека е со лисици, па врз основа на тие извештаи Омбудсманот подигна предмет - (Фото: Ѓ. Личовски)

    Народниот правобранител Иџет Мемети отворил постапка за случајот со приведувањето на пратениците од ВМРО- ДПМНЕ Крсто Мукоски, Жаклина Пешевска и Љубен Арнаудов, поради тоа што полицијата ги уапсила и ги спровела со лисици на рацете до Кривичниот суд, иако тие се повикале на пратеничкиот имунитет.

    “Во случајот кога не му е одземен имунитетот на осомниченото лице, и покрај писмената наредба за негово приведување, тоа нема да се изврши, а надлежниот суд ќе се извести од страна на полицискиот службеник за причините поради кои не е постапено по наредбата”, го цитираше Мемети прекршениот член од полицискиот правилник.

    Пратеникот Крсто Мукоски беше спроведен во Кривичниот суд во Скопје на 28 ноември без лисици на рацете, но некои медиуми објавија дека е со лисици. Другите двајца пратеници за кои Мемети покрена предмет јавноста не ги виде кога влегуваа во судот.

    Пратениците се уапсени по налог на Основното обвинителство под сомнение за извршено кривично дело „терористичко загрозување на уставниот поредок и безбедноста“. Осомничени се 36 лица кои учествуваа во организираниот напад на Собранието на 27 април.

    Екипа од кај Омбудсманот била во затворот Шутка која  разговарала со тројцата пратеници. Тие тврделе дека покажале легитимации, се повикале на пратеничкиот имунитет, а сепак биле приведени по судската наредба што ја потпишале судиите Ненад Савески и Весна Димишкова.

    Мемети очекува Министерот за внатрешни работи Оливер Спасовски, кого го пофали што му дал дури 38 документи за случајот и дека максимално соработувал, да преземе сѐ за да се разреши овој случај во дисциплинска постапка и ако ја има – по командна одговорност.

    Мемети нема одговор дали судиите еднаш се обиделе да ги повикаат уредно во судот овие осомничени и како одговориле на судските покани. Прашува зошто Судот издава наредби за за приведување, претрес и одземање предмети од домот на осомничени кои уживаат имунитет, без претходно да им биде одземен?

     

    С. К. ДЕЛЕВСКА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари