Маж од Суботица е прв потврден случај на коронавирус во Србија.

Министерството за здравство соопшти дека 43-годишникот е сместен во изолација. Тој неодамна се вратил од Унгарија.

„Се случи она што го очекувавме. Заразениот пациент се чувствува добро. Станува збор за маж кој престојувал кај сестра му во Будимпешта, која исто така имала симптоми на коронавирус. Тој бил одговорен и кога се вратил во Србија, сам се ставил во изолација“, изјави министерот Златибор Лончар.

КОВИД-19 вчера првпат беше регистриран и во Словенија и БиХ, додека во Хрватска веќе има 11 позитивни случаи.

Првиот заболен во Словенија се заразил во Мароко и бројката заразени во меѓувреме порасна на шест. Прв случај во БиХ е пријавен во Бања Лука, маж кој неодамна се вратил од работа во Италија.