Ненадејно почина новинарот и портпарол на компанијата ЕВН Атанас Ковачевски.
Од ЕВН потврдија дека Ковачевски починал рано утринава, а претходно немал посериозни хронични и здравствени проблеми.
Ковачевски имаше 50 години. Долги години беше новинар во неколку медиуми меѓу кои и во јавниот сервис Македонската радио телевизија. Последните 10 години беше портпарол на австриската компанија.
„Ковачевски со својата исклучителна професионалност и колегијалност даде огромен придонес во отвореноста на компанијата и нејзината комуникација, а со тоа генерално и во развојот на енергетскиот сектор во земјава. Тој даде огромен придонес во Одделот за комуникации, обликувајќи ги и пренесувајќи ги информациите од компанијата на едноставен и разбирлив начин. Портпаролската позиција во компанијата ја водеше со огромна посветеност и темелност“, велат од ЕВН.
