Судија на претходна постапка им одреди мерка притвор во траење од 30 дена на ексминистерот за внатрешни работи Митко Чавков, оперскиот пејач Игор Дурловски и на уште три други лица, постапувајќи по предлог на Основното јавно обвинителство за гонење организиран криминал и корупција, потврди Основниот суд Скопје 1 за државната агенција МИА. За две други лица, судијата на претходната постапка не го прифати барањето на обвинителеството и им изрече мерка куќен притвор.

„Постапувајќи по предлог на Основното јавно обвинителство за гонење организиран криминал и корупција, судија на претходна постапка при Основниот суд Скопје 1 – Скопје, по произнесување на спроведените лица во судот во однос на предлогот на обвинителството, донесе решенија со кои за О.П., О.Р., И.Д., М.П. и М.Ч. го прифати предлогот на обвинителството и им определи мерка притвор во траење од 30 дена, соопшти Основниот суд Скопје 1.За лицата Е.Б. и С.М., судијата не го прифати предлогот за определување мерка притвор, а како мерка за безбедување присуство им определи мерка куќен притвор“, соопшти Кривичниот суд.

За останатите лица, за кои сè уште не е завршено сослушувањето, од Судот велат дека јавноста ќе биде информирана утре.

Обвинителството утринава соопшти дека отворило истражна постапка против триесет и шест лица поради основано сомнение за сторено кривично дело Терористичко загрозување на уставниот поредок и безбедноста во врска со настаните од 27 април во Собранието, за кое што минимална казна е 10 години затвор. Попладнево, во Собранието пристигнаа барања за симнување имунитет за шестмина пратеници во врска со истрагата на обвинителството.