Техничкиот проблем кој доведе до недостапност на електронскиот систем за јавни набавки (ЕСЈН) е целосно надминат, соопштија од Бирото за јавни набавки (БЈН). Оттаму додаваат дека интегритетот на системот не е загрозен и очекуваат од утре системот да е целосно функционален, при што ќе можат да продолжат сите започнати постапки без ограничување и да се спроведуваат нови согласно законските одредби.

„Во моментот се работи на продолжување на роковите на сите тековни постапки, поради што е оневозможено најавување на ЕСЈН. Наредните денови очекуваме целосно нормализирање на сите функции на системот, за што дополнително ќе ве информираме“, велат од БЈН.

Веб-страната на Бирото за јавни набавки не беше во функција измината недела и беа блокирани сите јавни набавки.

Целата процедура за јавни набавки во државните органи, јавните претпријатија, агенции, училишта, фондови, во општините, оди преку сајтот е-набавки. Така е по закон. Оглас за јавна набавка, потоа добиени тендери, односно склучени договори за јавни набавки, по закон мора да се објават на веб-страната е-набавки.