Основното јавно обвинителство Кавадарци до надлежниот суд поднесе обвинение против три лица кои им се заканувале на градоначалникот на Кавадарци Митко Јанчев и на неговото семејство. Обвинението е за кривичното дело Загрозување на сигурноста од член 144 од Кривичниот законик. Првообвинетиот, за кој се бара притвор и кој има македонско и бугарско државјанство, се товари и за Ширење расистички и ксенофобичен материјал по пат на компјутерски систем од член 394-г.

Првообвинетиот подолг временски период на неговиот личен профил на Фејсбук пишувал објави со говор на омраза, навреди и повици за насилство и закани насочени кон градоначалникот на Кавадарци, поттикнувајќи омраза врз основа на политичка припадност и општествен статус. Обвинетиот 32-годишник објавувал и фотографии од оштетениот и неговите малолетни деца, заканувајќи се и кон нив, а како потврда за сериозноста на заканите споделувал и видеа во кои самиот пукал со автоматска пушка и пиштол.

„Од јули годинава започнал и преку телефонска апликација да се јавува кај градоначалникот, лично и преку пораки да се заканува по животот на оштетениот и неговото семејство“, соопштија од Обвинителството.

Второобвинетиот, исто така, телефонски пренесувал дел од заканите и пораките во име на првиот обвинет. Третиот обвинет коментирал на фејсбук објавите на првиот обвинет, заканувајќи му се со убиство на оштетениот градоначалник.