СЕ ВОДИ ИСТРАГА ПРОТИВ ПРЕТСТАВНИЦИ НА ВЛАСТА, А НЕ ЧЛЕНОВИ НА ВЛАДАТА, ПОЈАСНУВАЊЕ НА ИЗЈАВАТА НА ЗАЕВ

    СЕ ВОДИ ИСТРАГА ПРОТИВ ПРЕТСТАВНИЦИ НА ВЛАСТА, А НЕ ЧЛЕНОВИ НА ВЛАДАТА, ПОЈАСНУВАЊЕ НА ИЗЈАВАТА НА ЗАЕВЗаев зборувал на англиски јазик и не бил добро разбран, објаснуваат од Одделението за односи со јавност на Владата - од денешниот настап на Самитот (Фото: Влада на РМ)

    Владата денеска попладне испрати соопштение со појаснување и со делумна корекција на изјавата на премиерот Зоран Заев, дадена во рамките на неговото обраќање на панел-дискусијата на Самитот „Македонија 2025“ што се одржува во Скопје.

    Медиумите и агенциите пренесоа дека Заев рекол дека „двајца членови на Владата се под истрага поради корупција“.

    Во соопштението на Владата, пак, се наведува дека премиерот во изјавата рекол дека „се води истрага против двајца високи претставници на власта“.

    Инаку, Заев изјавата ја дал на англиски јазик, одговарајќи на прашања на учесниците на панел-дискусијата.

    „Доколку ние ги фокусираме нашите напори да ја искорениме корупцијата, овој чекор ќе биде силен ветер во грб за целото општество. Но, исто така, транспарентноста е многу важна. Ова го кажувам првпат, јас постојано ги охрабрувам граѓаните на нашето општество да пријавуваат потенцијални случаи на корупција и како резултат на тоа, во моментов се води истрага по овие дојави за двајца високи претставници на власта, кои се на должност неколку месеци. Се разбира, ова е само истрага, не можеме да откриваме повеќе детали. Со ова сакам да кажам дека законот мора да важи еднакво за сите“, изјавил Заев, пишува во соопштението на Владата.

     

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари