Судењето за предметот на СЈО „Тврдина-Таргет“ утринава беше одложено за 4 декември, кога со наредба на судот обвинетиот Сашо Мијалков треба да биде спроведен од притвор од затворот во Шутка. Поранешниот директор на УБК синоќа беше притворен и затворот „Скопје“ го известил Основниот суд Скопје 1 дека тој бил донесен во затворот во 19.55 часот.
Поранешниот министер за транспорт и врски Миле Јанакиески и бившиот генерален секретар на Владата Кирил Божиновски, кои беа притворени на 13 ноември вечерта, утредента на судењето на „Титаник“ за тешки изборни нерегуларности, исто така не беа спроведени и судењето се одложи.
Сашо Мијалков вчерва беше уапсен во неговиот хотел „Мериот“ во центарот на Скопје, на барање на Специјалното јавно обвинителство поради опасност од бегство и однесен во затворот во Шутка. Мерката притвор од 30 дена му е одредена токму за „Тврдина-Таргет“, каде што тој е главен обвинет за нелегално прислушување на илјадници граѓани на Република Македонија
Мијалков покрај во „Тврдина-Таргет“ е обвинет и во предметите на СЈО, „Трезор“, „Тортура“ и „Титаник 2“.
С. К. ДЕЛЕВСКА
