Претседателката на Судскиот совет Весна Дамева на итна седница што ја свика по острите реакции на јавноста по укинувањето на пресудите за Сашо Мијалков за британската опрема за следење и за масовното прислушување, предложи работна група под водство на координаторката Тања Чачарева – Илиевска, Мирјана Радевска-Стефкова и Мери Радевска да одат во Апелациониот суд Скопје да ги испитаат предметите „Тврдина-Таргет“, „Трезор“ и „Транспортер“, кој таму седи 3 години без одлука.
А по 1 јануари, најави таа, ќе има нов распоред и кој не се покажал како координатор досега и дозволил судовите што ги покрива да прават буквално што сакаат, ќе биде сменет од судовите што ги покривал.
Се побуни координаторката на најважниот, на Апелациониот суд Скопје, Тања Чачарева – Илиевска.
„Нема работната група да направи нешто што досега не е направено . Редовно ги следиме извештаите. Судиите немаат можност да го совладаат приливот на предмети на месечно и годишно ниво. Што би контролирала работната група? Надзор на што? Можеме само да видиме како ги совладувале предметите според бројот што го добивале и дали со иста динамика ги решавале. Толку можеме, за друго немаме надлежност”, кажа Чачарева – Илиевска.
„Не се согласувам со вас. Може да видиме дали овие предмети судиите намерно ги задржувале, натаму дали судијка одлучувала откако исполнила услови за старосна пензија, за мерките притвор во овие предмети и за многу други предмети“, ѝ одговори Дамева.
„Тогаш нека се прошири и со предметот ‘Алфа’“, рече потпретседателот на Советот Селим Адеми.
„Во ред“, рече Дамева и праша дали уште да се проширува списокот за проверка на предмети во Апелациониот суд Скопје.
Чачарева – Илиевска побара споредба да се направи со другите предмети. А не само овие да се гледаат.
Ни збор не кажа координаторката на Апелација Скопје дека ова се предмети од поранешното СЈО и се приоритетни предмети кои ЕУ и САД постојано во извештаите и усно ги спомнуваат дека се предмети од највисок јавен интерес и без нивно решавање, земјата нема да добие преодна оценка за владеење на правото.
С. К. ДЕЛЕВСКА
