Министерот за здравство Арбен Таравари на својот фејсбук профил објави дека колабирал и бил пренесен в болница.

„Вчера кружеше веста дека сум доживеал срцев удар. Бидејќи отсекогаш сум ја споделувал вистината со вас, ви кажувам што се случи. Доживеав ненадеен колапс и итно ме однесоа во болница. Сè уште сум под опсервација, бидејќи моите колеги сè уште немаат донесено никакви заклучоци. Сепак, добро сум, со семејството и ќе ги чекаме одговорите на лекарите“, објави Таравари.

Таравари по професија е невролог и доаѓа од Клиниката за неврологија. Тој е и претседател на партијата Алијанса за Албанците.

Од Министерството за здравство велат дека министерот е во добра состојба, добар е, дома е и одмара.

„Тој е во најдобра можна состојба. Не е во болница, дома е. Вчера беше прво на Неврологија, па на Кардиологија, па во Рентген институтот и потоа си замина дома. Ги направивме сите можни анализи, сѐ е чисто, сѐ е добро. Просто е – премор“, вели  Министерството.