Австриската сојузна министерка за ЕУ Каролине Едштадлер денеска во Скопје кажа дека е разбирливо што кај македонските граѓани владее разочараност и депримираност поради блокадата на евроинтеграциите со нови преговори и билатерални барања, но смета дека не смее да се изгуби вербата во ЕУ, затоа што нема друга алтернатива.

Министерката Едштадлер, на заедничката прес-конференција со вицепремиерот за евроинтеграции Бојан Маричиќ, рече дека не смеат да се дозволат нови поделби во ЕУ и земјите од Западен Балкан, среде војната во Украина и побара од македонската граѓани да веруваат во Европската унија.

„Кај населението има разочарување, мораме да говориме за тоа дека има разочараност, депримираност дека повторно има рунди преговори, билатерални барања, и тоа врзува многу капацитети. Ова разочарување сакаме да го прекинеме со поддршка за нашите партнери Бугарија, Северна Македонија и Албанија овие проблеми да бидат решени со надеж нешто навистина да се случи за време на француското претседателство и на граѓаните да им се даде чувство дека Европа не само говори и разговара, туку и дека е тука. Две години минуваат, а има застој во процесот и тој мора да биде прекинат. Сакам да им порачам на македонските граѓани, верувајте и понатаму во ЕУ, ние ќе се заложиме да не се поделиме, особено во ситуацијата кога руската агресивна војна во Украина беснее. Тоа не смееме да го дозволиме и затоа оваа можност ќе ја искористиме и тука сакам јасно да кажам дека ЕУ не е комплетна без земјите од Западен Балкан, особено Република Северна Македонија“, кажа Едштадлер.