Владата донесе одлука за формирање Совет за управување со јавни финансии, како највисоко координативно владино тело за следење на спроведувањето на реформите на управувањето со јавни финансии предвидени со Програмата за реформа на управувањето со јавни финансии 2024 – 2027 година. Како што соопшти Владата по денешата седница, Советот ќе го сочинуваат претседател и девет члена.
Претседател ќе биде министерот за финансии, а членови министерот за европски прашања, министерот за енергетика, рударство и минерални суровини, министерот за јавна администрација, министерот за дигитална трансформација, директорите на Царинската управа, на Управата за јавни приходи и на Бирото за јавни набавки, претседателот на Државната комисија за жалби по јавни набавки и главниот државен ревизор.
„Основни работи на Советот се да ги презема потребните активности при остварување на реформските цели на Програмата, да го разгледува и одобрува Предлог-годишниот акциски план за спроведување на Програмата пред негово усвојување од страна на Владата, да го следи спроведувањето на Програмата и Годишниот акциски план за спроведување на Програмата во однос на утврдените резултати, показатели и таргети, да ги разгледува, дава мислења и препораки за полугодишниот и годишниот извештај за напредок во спроведувањето на Програмата и на Годишниот акциски план за спроведување на Програмата кои се доставуваат на усвојување до Владата, да предлага мерки што влијаат врз временската рамка за спроведување на активностите, да предлага мерки поврзани со финансирање на активностите во рамките на Програмата, да обезбедува тесна соработка помеѓу релевантните институции вклучени во реализација на активностите, да решава кои било прашања поврзани со координација помеѓу засегнатите страни, да води дијалог за политиките на високо ниво со донаторите и другите засегнати страни за спроведување, финансирање и опфат на реформата на управување со јавни финансии, да следи и дава насоки за обезбедување на широка општествена поддршка за планираните реформи на управувањето со јавните финансии, да го води процесот на среднорочна и конечна процена на целите и резултатите на Програмата и предлага промени на мерките и активностите утврдени во Програмата и заеднички да ги разгледува критичните точки или тесни грла во понатамошното спроведување на Програмата, и предлага и презема корективни активности за решавање на идентификуваните проблеми (во поглед на процесот на управување со ризици“, соопшти Владата.
Владата ќе одвои и околу 580.000 евра за изградба и санација на вкупно 10 спортски објекти. Ќе се гради спортска сала во Воена академија – Скопје, во комплексот на касарната во Општина Аеродром наменета за питомците на Воената академија. Треба да се гради во текот на годинава и 2025. Ќе се гради и атлетска патека во Општина Гевгелија.
