ВМРО-ДПМНЕ до Собранието поднесе предлог-одлука за формирање анкетна комисија за испитување на целиот процес на гласањето на референдумот на 30 септември. На предлог-одлуката потпишани се триесет пратеници на ВМРО-ДПМНЕ.

„Основаните сомнежи за сторен фалсификат на правото на граѓаните за гласање, односно негласање, мора да се расчистат. Довербата на граѓаните во институциите е сериозно нарушена и некој мора да сноси одговорност“, соопшти пратеничката група на ВМРО-ДПМНЕ.

Покрај кампањата, комисијата, според предлогот на ВМРО-ДПМНЕ, ќе има задача да ги провери индициите дека на одредени избирачки места има нерегуларности, односно полнење на избирачките кутии и да утврди дали за време на референдумската кампања постоело поткуп на гласачите, како и притисоци од владини и партиски функционери од власта.

Формирање анкетна комисија за референдумот е едно од двете барања на претседателот на ВМРО-ДПМНЕ Христијан Мицкоски за партијата да прифати предвремени парламентарни избори, кои ги најави премиерот Зоран Заев во случај да нема двотретинско мнозинство во Собранието за уставни промени. Другото барање е избор на нов државен јавен обвинител по предлот на опозицијата.