Основното јавно обвинителство (ОЈО) Скопје поведе постапка против скопјанец кој удрил жена по глава со гајба полна стаклеши шишиња и тешко ја повредил. Осомничен е за кривичното дело Тешка телесна повреда од член 131 став 2 во врска со став 1 од Кривичниот законик.

„Делото го сторил вршејќи насилство врз жена со која имале претходни лични недоразбирања. На 23 август попладне оштетената отишла да се види со осомничениот пред угостителски објект во населбата Автокоманда. Тој најпрво започнал грубо да ја навредува, а потоа зел пластична гајба полна со стаклени шишиња, замавнал со неа и ја удрил по главата. Оштетената започнала обилно да крвари и зашеметена успеала да повика полиција, по што со брза помош била пренесена во болница, каде и биле констатирани тешки телесни повреди“, соопшти Обвинителството.

Заради заштита на жртвата, јавниот обвинител од судијата на претходна постапка од Основниот кривичен суд Скопје побара на осомничениот да му бидат определени мерките на претпазливост – забрана за приближување или воспоставување, односно одржување контакти или врски со оштетената, привремено одземање на патна исправа за преминување на државна граница и обврска да се јавува повремено на определено службено лице.