Десетина осудени лица кои издржуваат казна затвор во Казнено-поправнaта установа во Струмица се вклучија во процесот на дооформување на своето средно образование. Целиот процес се реализира преку ДСУ „Никола Карев“ од Струмица, кое од пред некоја година стана регионален центар за средно стручно образование. Професори од ова училиште во изминатиот период држеа консултации и предавања на осудените лица за општите предмети од тригодишно стручно образование. Носеа материјали и им укажуваа на што да обрнат внимание по македонски јазик, математика и странски јазик, бидејќи тоа беа првите предемти за кои полагаа писмен испит.
„Наша цел е луѓето кои се на издржување казна затвор овде рационално да го искористат времето, односно да се стекнат со нови работни вештини и образование. Адаптиравме училница во затворот каде осудените лица ќе учат и полагаат. Со овој процес, тие ќе имаат формално средно образование за да бидат поконкурентни на пазарот на трудот, а со тоа ќе се намали и рецивидизмот во земјава“, објасни Зоран Ристов, директорот на КПУ Затвор Струмица.
Меѓу пријавените кои почнаа да учат е и Димитар. Тој се одлучил да стекне средно образование од машинската струка, образовен профил автомеханичар. Го поздрави овој чекор бидејќи во затворот ќе престојува подолг период и планира и преку работна пракса да стекне вештини.
„Искрено го поздравуам овој проект и се надевам дека ќе стекнам некакво искуство. Средно образование немам, одев во училиште само два месеца, но поради одредени околности тргнав по некои други патишта. Сега се запишав за автомеханичар и сметам дека ќе ми користи, бидејќи планирам кога ќе излезам од овде да бидам шофер. Ова образование ќе ми помогне да поправам одредени дефекти“, кажа Димитар.
Тој со останатите осудени лица полагаше македонски јазик. Имаа слободна тема, да пишуваат за Кирил и Методиј или за Климент Охридски. Професорот по македонски при ДСУ ,,Никола Карев“ Ице Беличев вели дека ова е почеток на еден проект во кој се вклучени преку Министерството за образование.
„Сите училишта кои станаа регионални центри за средно стручно образование имаат можност да нудат дооформување на средното образование на осудени лица. Наши претставници од кариерниот центар направија анализа и утврдија дека овде осудениците сакаат да учат за автомеханичар и за профилот монтер за сува градба. Доколку постои желба од нивна страна, ова ќе биде успешене проект, пред сè, од аспект на нивна реинтеграција во општеството“, кажа професорот Беличев.
Во затворот во Струмица престојвуаат 90-ина осудени лица. Како што соопштија оттаму, 35 отсто од нив се работно ангажирани надвор од установата, каде што стекнуваат работни вештини.
В. ТРАЈКОВ
