Од Софија за САКАМДАКАЖАМ.МК: Ана Антевска

Премиерот Зоран Заев и техничкиот премиер на Бугарија Стефан Јанев договорија да продолжат разговорите на политичко ниво за да се најде решение за спорот. Двајцата кажаа дека решение е можно и дека тоа треба да го изнајдат политичарите.

„Прашањата не се нерешливи. И самото тоа што сме тука и седнавме да разговараме е успех и исчекор во изнаоѓање на решение во спорот. Ќе останеме и на вечера, заедно ќе го гледаме и фудбалскиот натпревар на нашата репрезентација на Европското првенство. Апелирам Бугарија да продолжи да ѝ помага на Македонија и на братскиот народ. Апелирам македонскиот и бугарскиот народ да го поддржат процесот оти станува збор за иднината на нашите деца. Историјата е важна но поважна е иднината на идните но и сегашните генерации. Верувам дека одлуки се можни не се нерешливе прашањата”, кажа Заев на заедничката прес-конференција.

Бугарскиот технички премиер Јанев рече дека на средбата имало добра атмосфера и дека политичарите треба да понесат одговорност и да најдат решение.

„Ние правиме сè што е возможно за да најдеме решение во најкус рок, на што се надевам дека ќе се случи“, рече Јанев.

Прашан за коментар за изјавата на експремиерот Бојко Борисов дека само лажат дека ништо не можат да направат, Јанев одговори дека тие биле на власт изминативе години и праша зошто не нашле решение за спорот.

Заев попладнево ќе има средба и со бугарскиот претседател Румен Радев.