„Не може да се толерира сѐ уште да постои високо ниво на загаденост на воздухот во оваа, дури и во земјите на ЕУ. Клучната работа е законодавството. Законите и законодаството можат да бидат бескорисни во случај ако не се спроведуваат и применуваат во пракса“, рече евроамбасадорот Дејвид Гир на церемонија на потпишување на програмата „ЕУ за чист воздух“ во Битола.

Во присуство на министерката за животна средина Каја Шукова, битолскиот градоначалник Тони Коњановски, денеска во Европската куќа во Битола, шефот на делегацијата на Европската унија, амбасадорот Дејвид Гир и Микела Телатин, директорка на канцеларијата на УНОПС за Северна Македонија го најавија почетокот на програмата „ЕУ за чист воздух“.

Целта е да се намалат емисиите на загадувачи и честички во Битола, Куманово, Скопје и во Тетово, со што ќе се подобри квалитетот на воздухот во земјава. 794.540 жители од четирите урбани центри директно ќе имаат придобивка од подобрените системи за греење во 70 јавни згради со површина од 200.000 квадратни метри, ќе се инсталираат нови станици за следење на квалитетот на воздухот и ќе се засадат 6.000 садници дрвја.

„Ова е клучно прашање. Ќе помогнеме колку што можеме земјата да ги постигне стандардите кои се применуваат во ЕУ за квалитетот на воздухот. Овие стандарди се дел од пристапниот процес на вашата земја, ние го евалиураме овој процес, па и тоа колку овие стандарди се во согласност со европските. Ова ќе стане уште поважно во ера на драстични климатски променичи и последици што веќе ги гледаме во повеќе земји од светот, но и од регионот“, рече Гир.

Скопје ќе добие шест еколошки автобуси за јавен превоз и ќе биде предмет на физибилити студија за натамошно проширување на системот за централно греење. Програмата „ЕУ за чист воздух“ произлегува од Европскиот зелен договор и целта е цела Европа да стане првиот климатски неутрален континент до 2050 година. Буџетот од 10 милиони евра ќе се спроведува во период од три години до 2026 година.

Ж. ЗДРАВКОВСКА