Германскиот фудбалски клуб Борусија Дортмунд го прекинува контроверзното спонзорско партнерство со производителот на оружје Рајнметал, соопшти бундеслигашот во петокот. Договорот, кој истекува кон средината на 2027 година, нема да биде продолжен по истекот на тригодишниот период.

Од клубот признаваат дека одлуката е донесена со заедничка согласност, а клучен фактор за неа биле континуираните критики од навивачите на Дортмунд во врска со оваа соработка. Извршниот директор на Борусија Дортмунд, Карстен Крамер, изјави дека раководството е свесно за критиките од членовите и од дел од навивачите и објасни дека тоа било земено предвид за време на разговорите со Рајнметал.

Рајнметал е најголемата германска компанија за производство на оружје и бележи силен раст во услови на војната на Русија во Украина и општиот пораст на побарувачката за вооружување. Кога спонзорскиот договор беше објавен во 2024 година, предизвика остри критики од пацифисти, организации за човекови права и дел од навивачката база на клубот.

Истата година, на генералното собрание, членовите на клубот гласаа против продолжување на договорот, иако таа одлука не беше обврзувачка за раководството на Дортмунд.

Претседателот на Борусија Дортмунд, Ханс-Јоаким Вацке, неодамна изјави дека потценил колку многу навивачи на клубот му велат дека не се против Рајнметал, но едноставно не сакаат Борусија Дортмунд да промовира компанија што произведува оружје, додавајќи дека тоа е став што не мора нужно да го прифати, но целосно го почитува.