Олимпиецот Дарио Ивановски од Атлетскиот клуб (АК) Скопски маратон денеска победи на полумаратонот на 9. издание на Атлетскиот викенд „Охрид трчаТ“.  Тој патеката од 21 километар ја мина за 1:08:53, што е за повеќе од една минута подобро од неговото победничко време минатата година (1:10:01) и нов рекорд на трката. Во женска конкуренција на полумаратонот  победи Фросина Михајловска од АК Аеродром, Македонија (1:28:37).

Втор на целта целта пристигна Мирослав Спасов од Бугарија (1:14:51ч.), трет Муџахид Мислими од Македонија (1:14:54ч.), а во женска конкуренција Теа Божиновска од АСК Скопски маратон (1:29:35) и Унгарката Чила Богнар (1:3012).

На 5 километри во машка конкуренција прв на целта пристигна Коста Петровски (18:48мин.) пред Григоријан Никовски (18:52мин.), двајцата од Македонија, а трет беше Илир Келези од Албанија (19:53 мин.). Во женска конкуренција на трката од 5 километри победи Дарија Крстевска од АК Олимп, Македонија, со време 23:12 минути, пред пред Емили Ивановска од АК Скопски маратон (25:27) и Лазарина Христова од Бугарија (25:37).

Во штафетната трка на 21 километар во машка конкуренција, победи екипата на АК Врањски маратонци (1:23:49ч.), пред Вирбу Цирбу (1:30:12) и ПауерфитбајЕп (1:32:41ч.). Во конкуренција на микс штафети победи Атомик (1:31:35ч.), пред Битола трчат (1:33:32ч.) и АК 7 Ноември Гевгелија (1:35:00ч.).

Во штафетната трка на 5 километри во машка конкуренција победи тимот на „Гостилница кај Мече“ (1:33:35), пред Инстинкт бар енд фоод (1:43:04) и ЛТХ Леарница (1:46:22). Во женска конкуренција победи штафетата на БФит (2:00:10ч.), пред АК Охрид трчаТ (2:01:01ч.) и Ран авај (2:09:38ч.).

Оваа година на „Охрид трчаТ“ учествуваат рекордни 2.400 тркачи од 28 земји.