Златан Ибрахимовиќ би можел да биде најновото големо засилување за Манчестер јунајтед за оваа сезона и клубот најави дека договорот ќе биде потпишан уште оваа недела, откриваат извори од „Олд Трафорд“ за „ЕСПН“.

Триесет и петгодишниот шведски фудбалер одби да го продолжи договорот откако тешко го повреди коленото во април, бидејќи му се предвидуваше пауза до јануари, но заздравувањето тече побрзо од очекуваното и тој соопшти дека е на прагот на камбек на фудбалските терени.

Ибрахимовиќ постигна 28 гола на 46 натпревари минатата сезона и тренерот Жозе Мурињо не сакаше да се откаже од него, и покрај повредата. Лос Анџелес галакси во јули изрази желба да го доведе високиот напаѓач, но тој преферира враќање на „Олд Трафорд“, дури и по цена на помала плата.