Легендата на американското борење Халк Хоган почина на 71 година, објави сајтот ТМЗ. Тој починал во својот дом во Флорида од срцев удар, според локалните медицински служби.

Со вистинско име Тери Џин Болеа, Хоган го трансформираше професионалното борење во семеен забавен спорт. Пред него, борењето привлекуваше мала публика, а неговата театралност во рингот стана магнет за деца и родители и му донесе огромна популарност на спортот.

Хоган започна феномен во поп-културата наречен „Халкманија“ откако го победи Ајрон Шеик на Светското првенство во тешка категорија во 1994. Две години подоцна, Хоган се трансформираше од херој во негативец, основајќи ја фракцијата Нов светски поредок и стана „холивудски Халк Хоган“. Тоа им донесе уште поголема слава на него и на професионалното борење.

Хоган имаше бројни незаборавни настапи, борејќи се против Двејн Џонсон, Андре Џајант, Ренди Севиџ и Ултимејт Вориор. Тој беше примен во Салата на славните на американското борење во 2005, но оттаму го исфрлија во 2015 поради расистички коментари.

Хоган имаше и успешна актерска кариера и беше активен во политиката, па отворено го поддржа Доналд Трамп во последната претседателска кампања.