Фудбалерот Романо Флоријани Мусолини, правнук на италијанскиот диктатор Бенито Мусолини, имаше деби од соништата во Серија А, откако во петокот му помогна на својот тим Кремонезе да го победи Сасуоло со 3:2.

22-годишникот влезе во игра од клупата за резерви во последните осум минути од натпреварот и успеа да изнуди пенал, од кој Мануел де Лука го постигна победничкиот гол. Со оваа победа, новопромовираниот Кремонезе, кој минатата недела го совлада и Милан, се искачи на врвот на табелата со две победи во два натпревари.

„Премногу работи се случија за кратко време, мислам дека никогаш нема да ја заборавам оваа ноќ, бидејќи отсекогаш сонував да дебитирам во Серија А. Мојата цел беше да направам разлика и среќен сум што успеав во тоа“, изјави Флоријани Мусолини по натпреварот.

Флоријани Мусолини, кој игра на позицијата десен бек, настапува за Кремонезе како позајмен играч од Лацио. Тој го носи дресот со број 22, а на грбот го има испишано името „Романо“.

Иако потекнува од младинската школа на Лацио, тој никогаш не доби шанса да заигра за првиот тим во најсилната италијанска лига. Претходните сезони ги помина на позајмици во третолигашот Пескара (2023-24) и второлигашот Јуве Стабија (2024-25).

При потпишувањето за Кремонезе, тој изјави дека е „тука за да игра фудбал“ и додаде: „Моето презиме повеќе им пречи на другите луѓе отколку мене“.

Бенито Мусолини ја основаше фашистичка партија и ја водеше Италија од 1922 година до неговото соборување од власт во 1943 година. Тој беше сојузник на Адолф Хитлер во Втората светска војна, а беше заробен и убиен во 1945 година.