Машката ракометна репрезентација ќе биде без еден од своите главни дефанзивци на претстојното Европско првенство, откако Велко Маркоски не беше вклучен во финалниот список на селекторот Данило Брестовац.

Маркоски заработи повреда на окото на еден од последните контролни натпревари и лекарскиот тим му препорача мирување од најмалку две недели, што значи дека целосно отпаѓа од комбинациите за ЕП. Од дебито на големите натпреварувања во 2012 година, Маркоски беше незаменлив во дефанзивните варијанти на сите селектори.

Македонија, повторно предводена од Кире Лазаров, Ристовски, Стоилов и Манасков, утре го почнува настапот на Европското првенство, а првиот противник ѝ е Украина (20.30 часот). Потоа следуваат мечевите со Чешка (недела) и со домаќинот Австрија (вторник) и од резултатите на ова првенство ќе биде познато какви се шансите на Македонија за пласман на Олимписките игри во Токио.