Најдобрите македонски ракометари се понадеваа дека можат да ја изненадат Шпанија, но се предадоа по 30-ина минути игра и одлучија да ги чуваат силите за утрешниот решавачки дуел со Исланд, пред да загубат со убедливи 21:32 (12:13) во рамките на четвртото коло на Светското првенство во Германија и Данска.

Македонија одигра чуден натпревар со европскиот првак, со две неспоредливи полувремиња: воодушеви во првото, па како да ја загуби желбата за надигрување на стартот на второто, откако противникот за само две минути направи серија од 5:0. Селекторот Гонсалес набргу реши дека е најдобро да ги повлече на клупата играчите кои ќе бидат клучни за утрешниот натпревар против Исланд (18 часот), кога ќе се брка пласман во главната фаза.

Никола Митревски ја имаше една од најдобрите партии во својата кариера, остварувајќи 11 одбрани во првото полувреме.